|
白沙屯 沙灘 竹排 防風林（na_） 浸青介海水 桃紅色介彩霞 千帆點點像星光 網魚介歌聲唱到天背 番豆 西瓜 紅磚老屋 恬靜介莊頭 鹹鹹介海風 萬民心中有香火 媽祖介歌聲唱到天頂 陪祢行路轉外家 為祢扛轎過水過峎 對苗栗到北港 二百年介堅持 四百里路介來回 係恩白沙屯子女 佬媽祖婆盡靚介緣份
挨礱披波 還細介時節 阿哥總係帶等捱去捉草馬仔 阿哥講該係著青衫介無敵鐵金鋼 頭那戴等外星人介探照目鏡 兩隻手擎等大鈸（pat_）鎌 大大粒介目珠當得人驚 阿哥總係拿來嚇捱 成時就嚇到噭 正來定定仔拐 過年過節磨粄介時節 阿哥愛同阿姆襯(ten)手放米 阿姆就煞力牯送（sung\）磨石 捱跋(bak_ )上凳仔企高高 愛看米仰般變粄仔 阿姆就會講 人當當在該挨礱披波無閒淬杈 細人仔毋好在這梗梗杈杈 阿哥看到當毋盼得 就會輕聲細語講 妳盡乖 去捉老虎哥同挨礱披波來分阿哥好無 阿哥又挑挑愛整勢捱 看捱知毋知 草馬仔、挨礱披波、老虎哥 係一隻賊牯三隻名
註釋： 草馬仔：苗栗四縣腔是＜螳螂＞的意思。 大鈸鎌：（pat_liam_）大鎌刀。 挨礱披波：（ai/lung_ pi/po/），比喻磨石磨的聲音和旋轉的動作。 另一層意思是新竹海陸腔說挨礱披波（ai\lung pi\po\）是指螳螂，螳螂 兩腳站起來自衛時和人推石磨的動作很相似。
三 叉 三叉个水比酒卡甜 千樹紅花係你留分捱 盡靚个風景 假使毋係心中有夢 又做得忍得幾多痛 佬阿姆个年輪 刻落佛祖个笑容底背 分人帶到五湖四海 分人賣到宇宙天邊 就毋敢毋記得 自家係樟樹个本質 毋管捱在奈位 吾个鄉音本本無改變
老 屋 落雨天 對屋簷下行過 滴滴溚溚介雨水 點點跌落吾介心肝窟(fut) 發風時 伊伊歪歪介門窗 用佢介老骨頭 撐等一門家風 好天時正知得 老屋用佢溜皮溜骨介手腳 佬皺之郎當介老面皮 恬恬仔記錄 一屋肚介春秋
９２１介舊症頭又擎起來痛
又擎（kia_）起來痛 ２００６１２２６２０２８ 恆春發出６．７ 深度２２公里介地牛大翻身 一分鐘介時間分你思考生命介意義 佇台南稅屋介３樓 喀（kak）等一隻細老鼠 瀉（sia）到外背去 ９２１介舊症頭 又擎起來痛 家破人亡樓倒屋漏介經驗 分心肝頭糾筋
第二道介地動 就像坐佇犖犖确确(lok lok kok kok) 介老火車底肚 窗仔門相打 屋角喊痛介聲
翻（pon/）到一禾埕 註：細老鼠：係一本書名，張捷明先生?客語文作品＜細老鼠同番豆＞。
作者簡介 江秀鳳 筆名江嵐，1958年生，苗栗銅鑼灣人。 曾任律師助理，基金會秘書。現為美術團體聯合會秘書，台灣兒童文學協會、台灣現代詩人協會理事等。寫作品類豐富，有詩、散文、小說等;以華文創作為主，兼及台語散文和小數之台語詩、客語詩寫作;曾獲多項文學創作獎。
|